Skemmtun - 10 verstu hokkímistök sögunar

Til gamans eru hér samantekin verstu mistök sem gerð hafa verið í íshokkí. Góða skemmtun VG

 

Serbar sterkastir í U18 en Ísland fast á eftir

Núna þegar Íslenska landsliðið skipað leikmönnum 18 ára og yngri er að lenda á Keflavíkur flugvelli er alveg rétt að skoða árangur liðsins á þessu móti sem var haldið á Izmit í Tyrklandi.

Fyrst ber að nefna að það voru tvö lið sem báru höfuð og herðar yfir önnur lið í þessum riðli og það voru annarsvegar Serbar og hinsvegar Íslendingar.  Hin liðin náðu ekki að tefla fram sambærilegum liðum.  Það var nokkurnvegin ljóst eftir fyrsta leik að Serbar væru það lið sem Íslendingar þyrftu að vinna til að komast uppúr riðlinum.  Íslendingar hafa gert það áður og var stefnan sett á það í upphafi ferðar.

Það er nokkuð ljóst að dagsformið réði því hvort liðið færi með sigur af hólmi, Serbar eða Íslendingar.  Í ár voru það Serbar sem voru víst harðir í horn að taka og uppskráru sigur að lokum 4 - 0.  Svona til samanburðar þá sigruðu bæði Serbar og Íslendingar hinar þjóðirnar á mótinu með tveggja stafa markatölu.

Þegar töluþyrstir menn fara að rýna í tölurnar, sem þeir hjá Alþjóðasambandinu skaffa, þá sjá þeir það fljótlega að Íslendingar hafa átt nokkuð frambærilegt lið á þessu móti.

Til að mynda þá átt við Íslendingar markahæsta mann mótsins, Egil Þormóðsson, sem skoraði alls 16 sinnum í mótinu og átti 2 stoðsendingar, alls 18 stig.  Hann vann 68% af þeim uppköstum sem hann tók. Liðsfélagi hans Gunnar Sigurðsson vermdi 3 sætið á þeim lista með 63%. Egill var kosinn sóknarmaður mótsins af mótsstjórn.

 

Athygli vekur að Íslendingar eiga 4 af 5 efstu mönnum í svokölluðum plús/mínus tölum.  Sem þýðir í raun það að þeir íslensku leikmenn sem eru á ísnum þegar skorað fyrir Ísland fá einn plús og fá á sig einn mínus þegar það er skorað á Ísland.  Það eru þeir Orri Blöndal, Egill Þormóðsson, Pétur Maack og Sigurður Árnason.

 

Í öðrurm tölulegum upplýsingum eru við íslendingar um og yfir meðallagi.  Sem verður að teljast nokkuð gott þar sem við erum að keppa við þjóðir sem skipta milljónum eða milljóna tugum.

 

Áfram Ísland

 

HP 

Sidney Crosby sýnir sig

Um daginn var rituð grein hérna á bloggið um Sid "The Kid" Crosby. Hér sýnir kappinn að honum er ýmislegt til lista lagt.

Og fyrst við erum byrjaðir þá kemur hann hérna með annað ekki síðra.

HH 

Ný "súperdeild" í Rússlandi

Það er það nokkuð ákveðið að þeir hjá Gazprom hafa ákveðið að stofna nýja deild í Rússlandi sem á að vera sambærileg eða jafnvel betri og áhugaverðari en sjálf NHL deildin.  

Sergei Naryshkin varaforseti Rússlands segir að íshokkí sé íþrótt rússa og sé svo stór hluti af rússnenskri sögu að það væri dapurt að horfa á eftir öllum bestu leikmönnum Rússlands fara til hinar stóru Ameríku til þess að láta sína drauma um frægð og frama í íþróttinni verða að veruleika. Þessvegna hefur rússnenska sambandið í samvinnu við Gazprom um að stofna nýja Súperdeild, nánar tiltekið The Continental Hockey League, KHL (Kontinentalnaya Hokkeynaya Liga), og á hún að byrja strax á næsta tímabili.

Þetta vilja þeir meina að eigi eftir að draga fleiri leikmenn, innlenda og erlenda, að því að spila íshokkí í Rússlandi. Það eru engar smátölu í kringum þessa deild og þeir sem ætla að komast með lið í þessa deild verða að byrja á að punga út rúmum 10 milljónum dollurum (660 mills ISL) og hafa fleiri en 5.500 manns á svæðinu sem liðið er á.  Það ætti ekki að vera vandamál fyrir Rússa í dag þar sem það drýpur smjör af hverju strái.... eða það segir Pútín allavega.

Hvað sem Pútín og smjöri líður þá verður spennandi að fylgjast með hvernig þessari deild vegnar í kappi við NHL deildina. 

 

HP 

U18 ferðasaga landsliðs 2. dagur

Fyrsti leikdagur Íslands runninn upp.  Hér vöknuðu menn kl. 7:45 og fóru út að skokka.  Morgunmatur rann svo ljúflega niður áður en menn svo gerðu sig klára fyrir ísæfingu kl. 9:45.

Það er ekki laust við að ég hafi fundið fyrir smá fiðringi í mönnum enda nokkrir að fara spila sinn fyrsta landsleik.  Æfingin gekk vel fyrir sig.  Það var smá bið eftir að við fengjum pekki til þess að nota á æfingunni...skipulagið ekki alveg að virka...en allt saman reddast þetta á endanum.  Það er ekki laust við að Tyrkirnir hafi "þetta reddast" genið eins og við íslendingarnir.

Eftir æfinguna fengum við rútubilstjórana til að skutla okkur í matvörubúð.  Við erum með 2 litlar rútur fyrir liðið og er annar rútubílstjórinn orðin einn af okkur.  Hann vill allt fyrir okkur gera og lætur stjórnendur mótsins heyra það ef honum finnst vanta eitthvað upp á þjónustuna við okkur.  Strákarnir keyptu sér smá snakk og drykki.  Ég held að allir hafi líka keypt sér ávexti til þess að friða samviskuna.  Sergei heldur þeim nefninlega við efnið varðandi mataræði íþróttamanna.  Þegar á hótelið var komið hélt Sergei fund með hverri línu fyrir sig og fór yfir leikskipulagið.  Svo var stormað í hádegismat og beint í koju á eftir til að safna kröftum fyrir leikinn.

Þá er komið að því.  Fyrsti leikur Íslands og það gegn sjálfum gestgjöfunum.  Leikurinn fór aðeins brösulega af stað.  Okkar menn eitthvað aðeins stressaðir.  Tyrkir skoruðu fyrsta markið við gífurlegan fögnuð áhorfenda.  Þetta varð til þess að okkar menn vöknuðu og byrjuðu að spila sitt hokkí.  Það leið ekki á löngu þar til við skoruðum og jöfnuðum leikinn. Eftir fyrsta markið var aldrei spurning hvoru megin sigurinn myndi lenda.  Okkar menn gjörsamlega yfirspiluðu Tyrkina á köflum.  Við náðum samt ekki að skora nema 6 mörk í fyrsta leikhluta.  Í öðrum leikhluta var komið að dómaranum að sýna kúnstir.  Hann gjörsamlega missti sig í dómum á bæði lið.  Þó fengum við að kenna meira á því.  Ég held að við höfum nánast verið einum til tveimur færri allan leikhlutann.  Enda náðu Tyrkirnir aðeins að halda í við okkur og skoruðu eitt mark í viðbót.  Þessi leikhluti endaði 2-1 fyrir okkur.  Í þriðja leikhluta voru Tyrkirnir orðnir ansi pirraðir og ekki hjálpaði dómarinn.  Svo erum við að kvarta yfir lélegri dómgæslu heima á Íslandi.  En strákarnir sýndu hvað í þá er spunnið og tóku öll völd á vellinum.  Við áttum 19 skot á mark meðan að þeir áttu 4 skot.  4 skot af þessum 19 urðu að marki og leikar enduðu 12-2  (sjá statistik)

Strákarnir voru svo komnir í koju kl. 23:00 og sofnuðu vært.

Á morgun miðvikudag er enginn leikur.  En meira um það síðar.

Syd "The Kid" snýr aftur

Hin ungi og efnilegi fyrirliði Pittsburg Penguins Sydney Crosby hefur snúið aftur eftir slæm meiðsli sem hann hlaut þann 18.janúar fyrr á þessu ári. Það er hægt að sjá hvernig hann meiðist hér http://youtube.com/watch?v=KlskPPhNrdI 

Strax eftir leikinn sem hann meiddist í kom tilkynning frá liðinu hans að hann færi illa meiddur og ekki væri séð fram á að hann mundi spila meira með liði sínu það sem eftir væri tímabilsins.  Stuttu síðar var sú yfirlýsing dregin til baka þegar það kom í ljós að meiðsli hans voru minni, slæm tognun, en í fyrstu var talið. Læknar áætluðu að hann mundi vera 6 til 8 vikur að jafna sig.

Áætlanir Pittsburgmanna um að komast í Playoffs (voru þá í 5 sæti deildarinnar) virtust að engu verða þegar það fréttist að að Sidney mundi ekki spila með næstu leikina, sem voru hvað mikilvægastir til að tryggja sér sæti í Playoffs.  En maður kemur í manns stað og í þessu tilfelli var það Evgeni Malkin sem steig upp og tók kyndill liðsins og hljóp.

Pittsburg hefur á þessum 21 leik sem Sydney var fjarverandi unnið hvern leikinn á eftir öðrum og eru núna í 1.sæti deildarinnar og allt bendir til þess að þeir komist í Playoffs.

Athygli vakti í leik gærkvöldsins, Pittsburg vs Tampa Bay, að Sydney var ekki settur í sína gömlu línu með Sykora og Malone. Aðalþjálfari liðsins, Michel Therrien, sagði í viðtali fyrir leikinn í gær að það væri ekki á dagskrá að taka línuna Malkin, Sykora og Malone í sundur á næstunni þar sem þeir væru ein skæðasta sóknarlínan í NHL í dagl, þrátt fyrir að Sydney Crosby væri komin aftur.

HP

U18 ferðasaga landsliðs 1. dagur

Nú er dagur eitt senn á enda hér í Tyrklandi.  Við komum hér síðastliðna nótt um 02:00 eftir langt ferðalag.  Seinkun varð á vélinni frá Frankfurt til Istanbul um einn og hálfan tíma. Það kom svo í ljós þegar við lentum í Istanbul að eina tösku vantaði.  Það tók um klukkutíma að skila inn skýrslu varðandi það mál.  Rútuferð á hótelið tók svo rúman einn tíma.  Það voru því þreyttir ferðalangar sem lögðust til hvílu hér í Izmit klukkan að verða þrjú að morgni.  Hótelið er töluvert komið til ára sinna og nokkuð ljóst að íslenskir iðnaðarmenn myndu skammast sín fyrir þau vinnubrögð sem hér sjást.  Ég held að hér hljóti iðnaðarmenn að fá sér eitthvað annað en vatn að drekka eða þá reykja eitthvað annað en sígarettur.  Hér er þó allt nokkuð hreint og svo sem ekkert hægt að kvarta.  Maturinn er góður og þjónustan mjög lipur. Tyrkir eru mjög gestrisnir og vilja allt fyrir þig gera.  Þó finnst okkur íslendingunum skipulagið mætti vera betra....bíðum nú aðeins við...erum við íslendingar nú allt í einu orðnir svona skipulagðir....  

Drengirnir voru svo vaktir kl. 9:00 og fengu morgunmat. Rúta sótti þá kl.10:00 og keyrði þá á ísæfingu.  Sergei keyrði þá áfram í einn og hálfan tíma enda ekki leikur í dag hjá okkur.  Hádegismatur var borðaður kl. 14:00.  Eftir matinn voru allir reknir í koju og látnir hvíla sig. 
Það kom nú í ljós að ekki þurftu allir á hvíldinni að halda.  Sett var upp rakarastofa í einu herberginu og sumir nýliðarnir fengu fría klippingu hjá þeim eldri. Þetta kallast víst busavígsla.  Það verður að segja klippurunum til hróss að ímyndunarafl þeirra er mjög öflugt.  Ég mun samt láta aðra dæma um hversu vel tókst til.  Undirritaður mun allavegana halda sig við sinn klippara í framtíðinni.   Seinnipartinn var svo horft á tvo leikhluta í leik Tyrklands og Serbíu. Staðan var 0-8 þegar við fórum aftur á hótelið. (endaði 0-12).

Það er ljóst að Serbía er það land sem við verðum að taka mjög alvarlega.  Fyrri leikurinn í dag á milli Búlgaríu og Armeníu endaði 24-1.  Armenar eru greinilega með algjört byrjenda lið.  Við verðum samt að passa okkur að ofmetnast ekki og taka vel á því strax í fyrsta leik á morgun gegn Tyrkjum.  Allir leikir Tyrkjanna eru sendir út í beinni útsendingu í sjónvarpi.
Stöðin heitir TRT3 ef einhver gæti haft aðgang að henni.  Einnig er hægt að fylgjast með stöðunni í riðlinum og allskyns tölfræði á eftirfarandi síðu http://www.iihf.com/index.php?id=686  og þar er einnig bein textalýsing á meðan á leik stendur.
Kvöldmatur var svo borðaður kl. 20:30 í kvöld.  Stuttur fundur var svo kl. 21:30 og þegar þetta er skrifað (23:00) er komin á ró, enda Sergei þekktur fyrir allt annað en agaleysi.  

Mér finnst hópurinn ná mjög vel saman.  Það er gaman að sjá hversu góðir félagar keppinautar úr þremur liðum geta verið. Engin agavandamál hafa komið upp og ég verð að hrósa strákunum fyrir jákvætt og skemmtilegt hugarfar.   Nú er kominn tími til að leggja sig enda strangt prógramm á morgun.  Ég kem til með að reyna að senda frá mér pistla á hverjum degi út ferðina ef tími vinnst til.  

Kveðja, Árni Geir Jónsson Fararstjóri

Írar sameinast í íshokkí

Írska íshokkísambandinu hefur tekist eitthvað sem írskum pólitíkusum hefur ekki tekist í áraraðir að gera sem er að sameina Lýðveldið Írland og Norður-Írland að einu markmiði og í eina íþrótt.  

Þó að Írar hafa sumpartinn lengri sögu (25 ára minnst) en við Íslendingar í íshokkí hafa þeir ekki haft erindi sem erfiði á heimsmælikvarða í íshokkí.  Þeir hafa verið að malla upp og niður úr 3 deild alveg frá byrjun og það með öll sín landslið.  Sumir þeir sem hafa eitthvað með íshokkí að gera á Írlandi vilja meina að þeir sem eru á Norður-Írlandi hafa verið að spila í deildum á Bretlandi og eru þar af leiðandi töluvert betri spilarar en þeir semeru frá Lýðveldinu Írlandi.  Við Íslendingar sáum það þegar þeir spiluðu við okkur Íslendinga árið 2004 þar sem við unnum frekar léttan sigur 7 - 1.  Þeir voru þó ekki lakastir á því móti þar sem Armenar voru, þá, arfaslakir og vermdu bottninn með alls 2 mörk gegn 73 eftir 4 leiki.

 

Þeir eru heldur ekki betur settir en við Íslendingar hvað varðar aðstæður þar sem þeir eru með 5 lið en einungis eitt skautasvell þar sem allar æfingar og leikir fara fram á.  Þar er fátt um almenningstíma en engu að síður er ekki auðvelt að koma 5 liðum í eina höll þá væntanlega hver með einhverja flokka sem þarf að æfa.

 

Þeir stefna á það að komast áfram uppúr 3.deild og ná að halda sér á svipuðum slóðum og Íslendingar sem er í 2.deild.

 

Karlalandslið Íslands fer alla leið til Ástralíu núna á vordögum að spila þar við heimamennn, Spán, Nýja-Sjáland, Kína og Mexíkó. 

U18 ára liðið á heimsmeistaramót.

U18 ára landslið Íslands undirbýr sig nú af kappi fyrir Heimsmeistararmótið í 3. deild sem fram fer í Izmit í Tyrklandi að þessu sinni.  Þjálfar liðsins þeir Sergei Zak og Jón Gíslason hafa undirbúið liðið vel en síðasta æfing liðsins fyrir brottför fer fram núna á laugardaginn en liðið heldur utan snemma á sunnudagsmorgun.

Keppnin fer fram dagana 3. - 9. mars og að þessu sinni mun liðið etja kappi við fjórar þjóðir, þ.e. Serbíu, Armeníu, Tyrkland og Búlgaríu.  Vegna fjölgunar hokkíþjóða í heiminum eru nú tveir riðlar í 3. deild og það gerir það að verkum að aðeins 1. sæti hleypir okkur upp úr deildinni og því er að duga eða drepast.

Leikmennirnir sem valdir voru til ferðarinnar eru:

 

Andri Már Mikaelsson
Andri Steinn Hauksson
Andri Þór Guðlaugsson
Arnar Bragi Ingason
Sigurður Árnason
Árni Freyr Jónsson
Orri Blönal
Carl Jónas Árnason
Egill Þormóðsson
Gunnar Darri Sigurðsson
Matthias Sigurðsson
Ólafur Hrafn Björnsson
Óli Þór Gunnarsson
Petur Maack
Ragnar Kristjánsson
Róbert Freyr Pálsson
Snorri Sigurbergsson
Snorri Sigurbjörnsson
Tómas Tjörvi Ómarsson
Ævar Þór Björnsson

 

HH 

Mörk í boði Icelandair

Nei kanski ekki alveg mörk í boði Icelandair en allavega flest skoruð þegar markaskorarinn er a einhverskonar flugi. Góða skemmtun.